Di drei Dosna (Dosen) - klassische Märchen

Di drei Dosna (Dosen)

S' war a moal an oami bluadoami Beirinn, de hot a Madl ghabt und dös hot Annamia'l1 ghaßa. A mal wia d'Annamia'l in d'Schul gonga r'is, is a rechta'n 'oama olda Dattl2 daherkema und hots bitt' um a bissa'l was. Da Annamia'l dö e als wia woachherzi woa, hot a d'aboamt3, wal n'a d'andan ali ausgheanzt4 ham und is heagonga und hot eam von Brot was zun Fruahstuck ghabt hot, d'greßari Hälfti geb'n. Jetz is owa dea r'Aldi heagonga, und hot ia drei scheni scheni Dosna geb'n und hot ai gsagt, daß is, eh'nda drei Joahr vuabei san, nit aufmocha deaf. D' Annamia'l hot de Dosna gnumma und da r'Aldi is vaschwundn.

Wia bald drei Joahr um woan, is d'Muada gstuab'n und 'Annamia'l hot a besi besi Stiafmuada kriagt. Da hot d'Annamia'l weida nit g'woant und s'is ia r'als wia hoat gscheg'n5. D'Stiafmuada hots nid a mal leid'n kinna, wanns gwant hot und hots immara' raunzats6 Mensch ghaßa. Und orwat'n hots miaßa so schwea, daß a sie nimma'r auskennt hot. A mal hots goa miaßa 'ra Klad mocha, des so glonzad woa wia d'Sunn. Weils des nit kinna hot, hots halt zun woana r'angfangt, daß schia r'an Stoan het d'aboama kinna. Do auf amal san ia dö drei Dos'na eingfalln, des z'schenka kriagt hot und sie is glei hea gonga, is hoam grennt und hot d'easti aufgmocht. Wia hots owa g'schaut, wias a schens schens Klad außazogn hot, des so glonzat woa wia d'Sunn. Volla Freid hots des Klad gnumma und is zu da Stiafmuada g'rennt und hot ias geb'n. De hot owa weida nit g'schnauzt7 wias des gseg'n hot und weils schiach woan is, hots ia glei gsogt, si soll a Leinwad8 spinna, de soll fufz'g Elln brat sein und soll si duach an Fingaring duachiziag'n lossa. D'Annamia'l is ietz heagonga und hot d'zweiti Dos'n aufgmocht und hot a Leinwad außazogn, de woa fufz'g Ell brat und hot si duach an Ring so guat duachiziag'n lossa, als obs nix wa. Volla Freid hots is da Stiafmuada brocht. Dö owa is fuchti woan driwa9, weils glaubt hot, d'Annamia'l hets gspunna, und hot ia gsogt, si soll a G'schloß bau'n gonz aus Glas, so hoch wia de hechsti Berg. D'Annmia'l is ietz hergonga, hot d'letzti Dos'n gnumma, is außigonga und hots wolln aufmocha, da is ia auf a mal owag'falln und stott da Dos'n is Gschloß da gwest, gonz aus Glas und des woa so hoch als da hechsti Berg. Wia des d'Stiafmuada geseg'n hot, is außi kema und iwa d'Stiag'n aufigrennt. Wias owa ob'n woa, is ausgruscht, owigfalln und hot si's Gnack brocha. D'Annamia'l owa r'is aufikema und wias omad10 woa, is ia r'a Prinz entgegn'n kema, hots g'heirat und d'Annamia'l is a großi, großi Kenichin woan, und wenns nit gstuab'n is, so lebts heint no.

Fußnoten

1 Anna Maria.

2 Mann.

3 Erbarmt.

4 Verspottet.

5 Ist ihr hart geschehen.

6 Stets weinend.

7 Die Nase gerümpft.

8 Leinwand.

9 Böse worden darüber.

10 Als sie oben war.

Wissenswertes

Märchen Gruppen

Intern

Anzeigen

Aktuelles

Märchen

Wörterbücher

Anzeigen

Dies & Das